Ինչպե՞ս արթնանալ հեշտությամբ ու հաճույքով

Տրամադրվել լավագույնին. հոգեբանական ճիշտ տրամադրվածությունը բառացիորեն հրաշքներ է գործում։ Միանշանակ, երբ մարդու հոգին հանգիստ է, ավելի խոր է քնում եւ հեշտությամբ արթնանում։

Եվ, ընդհակառակն վատ տրամադրությամբ անկողին մտնելով՝ մարդն ավելի վատ է քնում կամ տանջվում է անքնությունից։ Հետեւաբար՝ սովորեցեք ճիշտ տրամադրել ձեզ։

Եթե ցանկանում եք առավոտյան հեշտությամբ արթնանալ, ապա ձեզ դրան նախապատրաստեք դեռ երեկոյան։ Ամեն գալիք օրվա մեջ կարելի է պահեր գտնել, որոնց արժե հաճույքով սպասել՝ գուցե նախատեսել եք հաճելի մարդու հետ հանդիպել կամ աշխատավայրում հետաքրքիր մի նախագիծ եք փորձում իրականացնել, գուցե երեխաները կամ սիրելին խոստացել են համեղ ընթրիք պատրաստել, հնարավոր է պատրաստվում եք նոր զգեստ հագնել...

Կանխաճաշակեցե՛ք դա՝ անկողին մտնելով, եւ աշխատեք առավոտյան արթնանալու պահին առաջինն այդ մասին հիշել։

Սիրել եւ շնորհ անել

Սեքսոլոգներն այն կարծիքին են, որ առավոտյան սեքսը նոր օրվա գերազանց սկիզբ է։ Այն օգնում է կարգավորել էնդոկրին համակարգի աշխատանքը, ապահովում է «ուրախության հորմոնների»՝ էնդորֆինների արտադրությունը, բարձրացնում է ընդհանուր կենսունակությունը։ Առույգ տրամադրությամբ արթնանալը միանգամայն ապահովված է։

Մասնագետները խորհուրդ են տալիս՝ եթե ինքներդ հանդես չեք գալիս որպես նախաձեռնող, ապա մի վանեք ձեր զուգընկերոջ առաջարկությունը, եթե նույնիսկ այնքան էլ չեք ուզում արթնանալ։ Նրանք այն կարծիքին են, որ առավոտյան սեքսը շատերին ավելի մեծ բավականություն է պատճառում, քան գիշերայինը, որովհետեւ իդեալական քնից հետո մարմինը լրիվ թուլացած է։
Իսկ եթե միայնակ եք արթնանում, ապա 10-15 րոպե պարեցեք սիրած երաժշտության տակ։

Հանել սթրեսը

Քնի խնդիրներով զբաղվող մասնագետները՝ սունոլոգները, պնդում են, որ արթնացումը պետք է հնարավորին չափ քիչ սթրեսային լինի։ Առաջին հերթին՝ դա տեւականորեն չպետք է ձգձգվի։ Եթե նույնիսկ քնից չեք կշտացել, զարթուցիչը մի դրեք 10 րոպեով ավելի ուշ ժամանակի վրա, որպեսզի մի քիչ էլ քնեք։ Սունոլոգները խորհուրդ են տալիս ջանք գործադրել եւ արթնանալ հենց առաջին ազդանշանից։ Նրանք գտնում են, որ ավելի լավ է զրկել իրեն մի քանի րոպե ավել քնելուց (ի միջի այլոց կասկածելի բավականություն է) եւ արթնանալ առույգ, քան «ջարդված»։

Խորհուրդ է տրվում զարթուցիչը այնպիսի տեղ դնել, որ անջատելու համար ստիպված լինեք վեր կենալ կամ գոնե բարձրանալ անկողնուց։ Արթնանալու գործընթացը մեղմելու համար պետք է ծանոթ հաճելի մեղեդի դնել։ Եթե հնարավորություն կա՝ կարելի է մինչ վեր կենալը լավ տեսահոլովակ կամ սիրված ֆիլմից մի դրվագ դիտել։ Եթե արդեն վերջնականապես արթնացել եք, կարելի եւ նույնիսկ ցանկալի է մի քիչ պառկել եւ կատվի պես, ինչպես հարկն է, ձգվել։

Օդ շնչել

Հաճախ առավոտյան արթնանալը դժվար է այն պատճառով, որ ննջարանում բավականաչափ թթվածին չկա։ Դուք երեւի այն օդափոխում եք քնելուց առաջ, բայց, մասնագետների հաշվարկներով, նույնիսկ իդեալական չափով օդափոխված այն սենյակում, ուր երկու չափահաս մարդիկ են քնած, օդը հեղձուկ է դառնում արդեն երկու ժամ անց։

Հիշեցեք, որ երբ մայրիկը գալիս էր ձեզ արթնացնելու, բացում էր օդանցքը։ Դա պատահական չէ։ Մի ումպ թարմ օդը հիանալի կերպով հեշտացնում է օրգանիզմի անցումն արթուն վիճակի։

Եթե հնարավոր չէ քնել բաց օդանցքով, արթնանալուց հետո անմիջապես կիսաբաց արեք լուսամուտը եւ մի քանի անգամ խոր ներշնչեք։ Դա կառույգացնի եւ կօգնի վերջնականապես արթնանալ։ Ի միջի այլոց՝ շատ օգտակար է այդ պահին հորանջելը։ Դա օգնում է ուղեղն առավելագույն չափով ապահովել թթվածնով։

Սիրել ջուրը

Ջուրը ոչ միայն մեր կենսագործունեության բոլոր գործընթացների կատալիզատորն ու անմիջական մասնակիցն է, այլեւ՝... հիանալի զարթուցիչ։ Դիետոլոգները խորհուրդ են տալիս օրն սկսել ոչ թե ուտելով, այլ խմելով։ Հեղուկը բարձրացնում է տոնուսը եւ ճիշտ մեկնարկ հաղորդում մարսողական պրոցեսներին։ Առավոտյան լավագույն ըմպելիքը մեկ բաժակ ջուրն է, իսկ նախաճաշին՝ կանաչ թեյը կամ հյութը։ Սուրճն ավելի լավ է խմել նախաճաշի վերջում՝ արյան ճնշման բարձրացում չհրահրելու համար։

Այնպես որ, օրն սկսեք առանց գազի մեկ բաժակ ոչ շատ սառը ջրով։ Խմեք դանդաղ, փոքր կումերով։ Ցանկալի է անմիջապես կոնտրաստային կամ սառը ցնցուղ ընդունել։

Պահել ռիթմը

Մեզանից շատերը, ցավոք, սեփական կենսառիթմի հետ աններդաշնակ կյանքով են ապրում։ Հարկ եղածից ուշ ենք պառկում քնելու, իսկ արթնանալ ստիպված են լինում ավելի վաղ, քան հարկավոր է օրգանիզմին։ Իսկ չէ՞ որ դա ժամանակից շուտ մաշում ու ծերացնում է մեզ։ Եվ, իհարկե, չի նպաստում առավոտվանից առույգություն զգալ։ Բաց մի թողեք «քունն առնելու» ցանկացած հնարավորություն։ Անկողին մտեք այն ժամանակ, երբ քնել եք ուզում։ Ընդ որում՝ աստիճանաբար ընտելացրեք ձեզ քնել եւ արթնանալ փոքր–ինչ ավելի վաղ։

Տեսնել լույսը

Գիշերային մթությունը հանգստանալու բնական ազդանշան է։ Այդ պատճառով էլ մութ սենյակում արթնանալն առանձնապես դժվար է։
Արեգակի լույսը ճնշում է«քնի հորմոնի»՝ մելատոնինի արտադրությունը եւ ակտիվացնում հակասթրեսային հորմոնի արտադրությունը։ Ահա թե ինչու խորհուրդ է տրվում արթնանալուց անմիջապես հետո բացել վարագույրները։ Եթե դրսում մռայլ եղանակ է, վառեցեք լույսը։ Գունազարդեք ձեր շուրջբոլորը. մահճակալի կողքին մի քանի մանդարին կամ խնձոր դրեք, սեղանին՝ վառ ծաղկեփունջ, խոհանոցում՝ կարմիր կամ նարնջագույն սփռոց, վարագույրներ ու գավաթներ ունեցեք։

Նաեւ հիշեցեք, որ գիշերվա ընթացքում հակասթրեսային հորմոնը հիանալի կերպով արտադրվում է, եթե քնելուց մի քանի ժամ առաջ (բայց ոչ քնելուց անմիջապես առաջ) ակտիվորեն սպորտով զբաղվեք։

Հարցեր, պատասխաններ, մեկնաբանություններ